తెలుగు రాష్ట్రాల మధ్య జల వివాదాలకు పరిష్కార దిశలో అడుగు – నిపుణుల కమిటీ ఏర్పాటు చేసేందుకు నిర్ణయం
To resolve long-standing water disputes between Telangana and Andhra Pradesh, the Centre has decided to constitute an expert committee after a high-level meeting in Delhi involving both Chief Ministers and Union Minister C.R. Paatil.
తెలుగు రాష్ట్రాల మధ్య సాగుతున్న జల వివాదాలకు పరిష్కార దిశగా కదలిక మొదలైంది. ఢిల్లీలో కేంద్ర జలశక్తి శాఖ మంత్రి సీఆర్ పాటిల్ అధ్యక్షతన నిర్వహించిన కీలక సమావేశంలో తెలంగాణ ముఖ్యమంత్రి రేవంత్ రెడ్డి, ఆంధ్రప్రదేశ్ ముఖ్యమంత్రి చంద్రబాబు నాయుడు పాల్గొన్నారు. ఇరు రాష్ట్రాల ప్రధాన జల సమస్యలపై చర్చించేందుకు ఏర్పాటైన ఈ సమావేశంలో, వివాద పరిష్కారానికి నిపుణుల కమిటీని ఏర్పాటు చేయాలని నిర్ణయించారు.
ఈ సమావేశంలో దాదాపు గంటన్నర పాటు చర్చలు జరిగాయి. తెలంగాణ ప్రభుత్వం మొత్తం 13 అంశాలను ప్రతిపాదించింది. వాటిలో పాలమూరు–రంగారెడ్డి, దిండి ఎత్తిపోతల పథకాలపై అనుమతులు, శ్రీశైలం నుంచి నీటి తరలింపుని ఆపడం, క్రిష్ణా జలాలను ఇతర బేసిన్లకు తరలించకుండా చర్యలు తీసుకోవడం, ఇసుకల ప్రాజెక్టులకు మద్దతుగా కేంద్ర జలశక్తి శాఖ వ్యవహరించాలన్న డిమాండ్లు ఉన్నాయి.
తద్వారా, ఇరు రాష్ట్రాల మధ్య పెరిగిన ఉద్రిక్తతలపై చర్చించి, జలాల వినియోగం, ప్రాజెక్టుల నిర్మాణం, పునరుద్ధరణ వంటి అంశాలపై కేంద్రం స్పష్టత తీసుకురావాలని తెలంగాణ కోరుతోంది. ముఖ్యంగా బనకచర్ల ప్రాజెక్టుపై తీవ్ర అభ్యంతరం వ్యక్తం చేస్తూ, ఈ అంశాన్ని సమావేశం నుంచి తొలగించాలని తెలంగాణ స్పష్టం చేసింది. అయితే ఏపీ మాత్రం బనకచర్ల అంశంపైనే చర్చ జరగాలని పట్టుబడుతోంది.
ఈ భేటీలో కృష్ణా నదీ యాజమాన్య బోర్డు ఏపీలో ఉండగా, జీఆర్ఎంబీ కార్యాలయాన్ని తెలంగాణలో కొనసాగించాలన్న ప్రతిపాదనపై కూడా చర్చించారు. నిపుణుల కమిటీ సోమవారం లోపు ఏర్పాటు కానుంది. భవిష్యత్‌లో ఏప్రత్యేకమైన అభిప్రాయాలు, చట్టబద్ధమైన చర్యలు అవసరమైన సందర్భంలో ఈ కమిటీ నివేదిక ఆధారంగా కేంద్రం నిర్ణయం తీసుకోనుంది.
ఈ సమావేశానికి ముందు ఇరు రాష్ట్రాల జలవనరుల శాఖలు కేంద్రానికి తమ తమ అంశాలతో కూడిన ఎజెండాను పంపించాయి. గతంలో ఇలాంటి అపెక్స్ కౌన్సిల్ భేటీలు రెండు సార్లు జరిగినప్పటికీ, ఈసారి జల వివాదం రాజకీయంగా తీవ్రతరమైన నేపథ్యంలో మరింత ప్రాధాన్యతను సంతరించుకుంది.
ఈ సమావేశం చర్చలకు మార్గదర్శకంగా ఉంటుందని భావిస్తున్నారు. త్వరలో జరగబోయే నిపుణుల కమిటీ సమావేశంతో జల వివాదాలకు శాశ్వత పరిష్కారం దిశగా ముందడుగు పడనుందని కేంద్రం భావిస్తోంది.