బాపట్ల జిల్లా బల్లికురవలోని గ్రానైట్ క్వారీలో బండరాళ్లు కూలిపోవడంతో 6 మంది కార్మికులు దుర్మరణం చెందగా, 10 మందికి తీవ్రగాయాలయ్యాయి. నలుగురి పరిస్థితి విషమంగా ఉంది.
A major accident occurred at a granite quarry in Ballikurava, Bapatla district, where falling rocks killed six workers and seriously injured ten others. Four of the injured are in critical condition.
బాపట్ల, ఆగస్ట్ 4:
బాపట్ల జిల్లా బల్లికురవలో ఆదివారం మధ్యాహ్నం ఘోర ప్రమాదం చోటుచేసుకుంది. స్థానికంగా ఉన్న ఓ గ్రానైట్ క్వారీలో అకస్మాత్తుగా భారీ రాళ్లు కూలిపడటంతో అక్కడ పనిచేస్తున్న కార్మికులు రాళ్ల కింద నలిగిపోయారు. 16 మంది కార్మికులు పని చేస్తున్న సమయంలో ఈ ప్రమాదం జరిగింది. దీంతో ఆరుగురు మృతిచెందారు. ఇప్పటివరకు నాలుగు మృతదేహాలను వెలికితీశారు. మిగిలిన ఇద్దరి మృతదేహాల కోసం సహాయక చర్యలు కొనసాగుతున్నాయి.
ఈ ప్రమాదంలో గాయపడిన మరో పదిమంది కార్మికులను నరసరావుపేట ప్రభుత్వ ఆసుపత్రికి తరలించారు. వీరిలో నలుగురు పరిస్థితి ఆందోళనకరంగా ఉందని వైద్యులు తెలిపారు. మృతులంతా ఒడిశాకు చెందినవారని అధికారులు వెల్లడించారు.
ప్రమాదం కారణంగా సమాజం తీవ్రంగా స్పందిస్తుండగా, క్వారీ యాజమాన్యం బద్రతా చర్యలు పాటించలేదని ప్రాథమికంగా నిర్ధారించిన అధికారులు దర్యాప్తు ప్రారంభించారు. ప్రత్యక్ష సాక్షుల ప్రకారం, రాళ్లు అకస్మాత్తుగా కూలి పడటంతో కార్మికులు తృటిలో బలయ్యారు.
ప్రమాదంపై స్పందించిన ముఖ్యమంత్రి చంద్రబాబు నాయుడు అధికారుల వద్ద నుంచి నివేదిక కోరారు. గాయపడినవారికి అత్యుత్తమ వైద్య సేవలు అందించాలని ఆదేశించారు. ఈ ఘటనపై మంత్రి నారా లోకేష్ తీవ్ర విచారం వ్యక్తం చేస్తూ, “ప్రభుత్వం మృతుల కుటుంబాలకు అండగా ఉంటుంది. గాయపడిన వారు త్వరగా కోలుకోవాలని కోరుకుంటున్నాను” అని అన్నారు. అలాగే మంత్రులు అనగాని సత్య ప్రసాద్, గొట్టిపాటి రవి కుమార్, కలెక్టర్ మురళి కూడా ఈ ఘటనపై విచారం వ్యక్తం చేశారు. జిల్లా, డివిజన్ స్థాయి అధికారులు సహాయక చర్యలను పర్యవేక్షించాలని ఆదేశించారు.