రాష్ట్ర రైల్వే అభివృద్ధికి సీఎం రేవంత్ విజ్ఞప్తి – రీజనల్ రింగ్ రైలు, ఖాజీపేట డివిజన్, కొత్త మార్గాలకు కేంద్రానికి ప్రతిపాదనలు
CM Revanth urges Centre for Telangana rail projects including Regional Ring Rail, Kazipet Division, and new industrial corridors
కేంద్ర రైల్వే మంత్రి అశ్వినీ వైష్ణవ్‌ను కలిసిన ముఖ్యమంత్రి రేవంత్ రెడ్డి, తెలంగాణలో రైల్వే కనెక్టివిటీ మెరుగుపర్చేందుకు పలు ప్రతిపాదనలు సమర్పించారు. రీజనల్ రింగ్ రైలు, ఖాజీపేట డివిజన్, డ్రైపోర్ట్–బందరు మార్గంతో పాటు కొత్త రైలు మార్గాలపై అనుమతులు కోరారు.
న్యూఢిల్లీ:
కేంద్ర ఐటీ, రైల్వేశాఖ మంత్రి అశ్వినీ వైష్ణవ్‌తో తెలంగాణ ముఖ్యమంత్రి రేవంత్ రెడ్డి సమావేశమయ్యారు. రాష్ట్రానికి చెందిన కీలక రైల్వే ప్రాజెక్టులపై చర్చించి అనుమతులు మంజూరు చేయాలని విజ్ఞప్తి చేశారు. రంగారెడ్డి జిల్లా ముచ్చెర్లలో హైటెక్ ఎలక్ట్రానిక్స్ పార్క్ ఏర్పాటు కోసం ఈఎంసీ 2.0 కింద రాష్ట్ర ప్రభుత్వం చేసిన ప్రతిపాదనను మంత్రి దృష్టికి తీసుకెళ్లారు. ఇది రీజనల్ రింగు రోడ్డుకు సమీపంగా ఉండేలా నూతన ఎలక్ట్రానిక్స్ మాన్యుఫ్యాక్చరింగ్ హబ్‌గా అభివృద్ధి చేస్తామని చెప్పారు.
హైదరాబాద్ రీజనల్ రింగ్ రోడ్డుకు అనుసంధానంగా ప్రతిపాదించిన రీజనల్ రింగ్ రైలు ప్రాజెక్టుపై వివరాలు సమర్పించిన సీఎం, ఇది నగర ట్రాఫిక్‌ను తగ్గించడంతో పాటు గ్రామీణ-పట్టణ ప్రాంతాల మధ్య రవాణాను వేగవంతం చేస్తుందని తెలిపారు. ఇప్పటికే రైల్వే బోర్డు ఫైనల్ లొకేషన్ సర్వేకు అనుమతి ఇచ్చిందని గుర్తుచేసి, రూ.8,000 కోట్ల విలువైన ఈ ప్రాజెక్టుకు త్వరగా మంజూరును కోరారు.
ఖాజీపేట రైల్వే డివిజన్ ఏర్పాటును ప్రత్యేకంగా ప్రస్తావించిన సీఎం, ఇది రాష్ట్ర రైల్వే కార్యకలాపాల సమర్థతను పెంచుతుందని చెప్పారు. ప్రయాణికులకు భద్రత, వేగవంతమైన సేవల కోసం ఈ డివిజన్ అవసరమని వివరించారు.
హైదరాబాద్ డ్రైపోర్ట్ – బందరు ఓడ రేవు మధ్య రైలు మార్గాన్ని మంజూరు చేయాలని కూడా సీఎం విజ్ఞప్తి చేశారు. ఔషధాలు, ఎలక్ట్రానిక్ పరికరాలు, ఫుడ్ ప్రాసెసింగ్ ఉత్పత్తుల ఎగుమతులు, దిగుమతులకు ఇది దోహదపడుతుందని తెలిపారు.
అదనంగా, రాష్ట్రంలోని వివిధ ప్రాంతాల అనుసంధానానికి అవసరమైన కొత్త రైలు మార్గాలు ప్రతిపాదించారు. వాటిలో:
- వికారాబాద్ – కృష్ణా (122 కి.మీ, రూ.2,677 కోట్లు)
- కల్వకుర్తి – మాచర్ల (100 కి.మీ, రూ.2,000 కోట్లు)
- డోర్నకల్ – గద్వాల (296 కి.మీ, రూ.6,512 కోట్లు)
- డోర్నకల్ – మిర్యాలగూడ (97 కి.మీ, రూ.2,184 కోట్లు)
ఈ మార్గాలన్నింటినీ 100 శాతం రైల్వే శాఖ వ్యయంతో మంజూరు చేయాలన్నారు. సీఎం విజ్ఞప్తులకు కేంద్ర మంత్రి సానుకూలంగా స్పందించినట్లు ప్రభుత్వ ప్రకటన పేర్కొంది. ఇది రాబోయే కాలంలో రాష్ట్రంలోని పలు జిల్లాలకు రైల్వే కనెక్టివిటీ మరింతగా పెరిగే అవకాశాలను మెదిలిస్తుంది.