తిరుపతి : దేశంలో మరెక్కడా లేని విధంగా టీటీడీ గిరిజన, ఎస్సీ, మత్స్య కార, బిసి గ్రామాల్లో పెద్ద ఎత్తున హిందూ ధర్మ ప్రచారం నిర్వహిస్తోందని టీటీడీ చైర్మన్‌ వైవి సుబ్బారెడ్డి తెలిపారు. రంపచోడవరంలో రూ 2 కోట్లతో కల్యాణ మండపం నిర్మించి గిరిజనులకు అందుబాటులోకి తెస్తామని చెప్పారు. రంపచోడవరంలో టీటీడీ నూతనంగా నిర్మించిన శ్రీ వేంకటేశ్వరస్వామివారి ఆలయ మహాసంప్రోక్షణ కార్యక్రమం సోమవారం జరిగింది. చైర్మన్‌ సుబ్బారెడ్డి దంపతులు పాల్గొన్నారు. ఈ సందర్బంగా చైర్మన్‌ భక్తులతోను, విూడియాతోను మాట్లాడారు. మన్యం వీరుడు,స్వాతంత్య్ర సమరయోధుడు, దేశ భక్తుడు శ్రీ అల్లూరి సీతా రామరాజు నడయాడిన ప్రాంతంలో నివసిస్తున్న గిరిజనులకు శ్రీ వేంకటేశ్వర స్వామివారిని మరింత దగ్గర చేసి వారికి స్వామి అశీస్సులు అందేలా చేయాలని ముఖ్యమంత్రి వైఎస్‌ జగన్‌ మోహన్‌ రెడ్డి ఆదేశం మేరకు రంపచోడవరంలో రూ.7.50 కోట్లతో శ్రీ వేంకటేశ్వరస్వామివారి ఆలయం నిర్మించామన్నారు. మరో రూ . 50లక్షలతో ఇతర అభివృద్ధి పనులు కలుపుకుని మొత్తం రూ 10 కోట్లు ఖర్చు చేస్తున్నామని ఆయన తెలిపారు . మహాసంప్రోక్షణ అనంతరం భక్తులకు స్వామివారి దర్శనం ప్రారంభించినట్లు ఆయన తెలిపారు. రంపచోడవరంతో పాటు చుట్టుపక్కల ప్రాంతాల ప్రజలు కూడా ఇక్కడకి వచ్చి స్వామివారిని దర్శించుకోవడానికి వీలుగా అన్ని సౌకర్యాలు కల్పించామన్నారు.ఇటీవల సీతంపేటలో రూ.10 కోట్లతో అన్ని సదుపాయాలతో శ్రీ వేంకటేశ్వరస్వామివారి ఆలయం, కల్యాణ మండపం నిర్మించడం జరిగిందన్నారు.జీవితంలో ఒక్కసారి కూడా తిరుమల శ్రీ వేంకటేశ్వరస్వామి దర్శనం చేసుకోలేని గిరిజనులకు రవాణా, వసతి, ఆహారం ఉచితంగా కల్పించి బ్రహ్మోత్సవాలు, వైకుంఠ ద్వార దర్శనం ఉచితంగా చేయిస్తున్నామని చైర్మన్‌ వివరించారు.గిరిజన, ఎస్సీ, బిసి గ్రామాల్లో సుమారు 2500 ఆలయాలు నిర్మిస్తున్నామని తెలిపారు. ఈ ప్రాంతాల్లో నుంచి స్వామివారి విూద అచంచలమైన భక్తి విశ్వాసాలతో వేలాది మంది శ్రీవారి సేవకులుగా తిరుమలకు విచ్చేసి తోటి భక్తులకు సేవ చేయడం అభినందించదగ్గ విషయని అభినందించారు . రాబోయే రోజుల్లో ఈ ప్రాంతాల నుండి మరింతమంది శ్రీవారి సేవకులుగా భక్తులకు సేవలు అందించేందుకు సిద్ధం కావాలని కోరారు. ఎంపి మార్గాని భరత్‌, ఎమ్మెల్యే ధనలక్ష్మి. ఉమ్మడి తూర్పుగోదావరి జిల్లా జడ్పీ చైర్మన్‌ విప్పర్తి వేణుగోపాలరావు. రంపచోడవరం ఐటీడీఏ ఏపీవో జనరల్‌ సిహెచ్‌ శ్రీనివాసరావు.జడ్పిటిసి సభ్యులు పండ వెంకటలక్ష్మి. బేబీ రత్నం. వైస్‌ ఎంపీపీలు కే బాలకృష్ణ. పండ కుమారి. కారుకోడు పోచమ్మ. ఉలవల లక్ష్మి. తాసిల్దార్‌ పి వెంకటేశ్వరరావు. ఎంపీడీవో ఎంవీఆర్‌ కుమార్‌ బాబు తదితరులు పాల్గొన్నారు.